Данийн Үндэсний Музей, Аархус хотын Угсаатны зүйн “Моосгард” музей хамтран зохион байгуулсан “Чингис Хааны тал нутаг-Монголын нүүдэлчид” тусгай үзэсгэлэн 2018 оны 6-р сарын 18-ны өдөр нээлтээ хийлээ.

Уг үзэсгэлэнд Данийн аялагч, угсаатан судлаач Хэнинг Хаслунд Кристенсений 1920-30-аад онуудад хийсэн судалгаа, угсаатны эд өлгийн цуглуулгын дээж болох 1240 орчим үзмэр, Монголын Үндэсний музей, ШУА-ийн Түүх, Археологийн хүрээлэнгийн 13-р зууны эд хэрэгсэл, түүхэн олдворуудыг багтааж, орчин үеийн дижитал технологийг ашиглан олон нийтэд сонирхолтой байдлаар Монголын нүүдэлчдийн соёл иргэншил, Чингис Хааны дэлхийг эзэлсэн түүхэн үйл явдлыг дэлгэн харуулжээ.

Үзэсгэлэнгийн нээлтийн үеэр Данийн Моосгард музейн захирал Mads Kähler Holst хэлсэн үгэндээ “Монгол Улс-Данийн Вант Улс хооронд дипломат харилцаа тогтоосны 50 жилийн ойн босгон дээр дэлхийг байлдан дагуулагч Чингис Хааны тал нутаг, нүүдэлчдийн аж амьдралын талаар, эдгээрийг одоог хүртэл хадгалан өвлөж ирсэн ард түмний түүхэн, сонирхолтой үзэсгэлэнг Нордикийн оронд анх удаа гаргаж байгаадаа нэн таатай байгаагаа илэрхийлээд цаашид хамтарч ажиллах, судалгааны чиглэлээр хамтын ажиллагааг өрнүүлэх чухал алхам боллоо” гэж цохон тэмдэглэв. Мөн тэрбээр энэхүү үзэсгэлэнг зохион байгуулахад гүн туслалцаа, дэмжлэг үзүүлсэн Монгол Улсаас Шведийн Вант улсад суугаа ЭСЯ-ны хамт олон, БСШУСЯ, Монголын Үндэсний музей, ШУА-ийн Түүх, археологийн хүрээлэн зэрэг хамтран оролцсон талуудад талархаж байгаагаа илэрхийлэв.

Монгол Улсаас Шведийн Вант улсад суугаа Элчин сайд М.Энхсайхан тус үзэсгэлэнгийн нээлтэнд хэлсэн үгэндээ “Өнгөрөгч хугацаанд Монгол Улсыг бүхий л талаар дэмжиж ирсэн Данийн Вант Улсын Засгийн газар, Данийн нийт ард түмэнд гүн талархлаа илэрхийлье. Данийн Вант Улс нь Монгол Улстай дипломат харилцаа тогтоосон анхны Өрнөдийн ардчилсан улсуудын нэг бөгөөд Монгол, Дани хоёр улс нь ардчилал, хүний эрх, хуулийн засаглал, тогтвортой хөгжлийн зорилт зэрэг нийтлэг үнэт зүйлс дээр суурилсан баялаг түүхэн харилцаатай улсуудын нэг билээ.

Түүхэн баримтуудаас харахад “The Great Northern Telegraph” нэртэй Данийн компанийн барьж байгуулсан телеграфийн шугам нь Бээжин, Их Хүрээ, Санкт-Петербургийг холбон Лондон хүрсэн байдаг бөгөөд үүний ачаар Нью Йорк Таймс сонины 1911 оны 12 дугаар сарын 28-ны дугаарт “маргааш Богд хаан тэргүүтэй Монгол нь тусгаар тогтнолоо зарлан тунхаглах гэж байна” гэсэн жижигхэн нийтлэл гарч байсан нь тохиолдлын зүйл яав ч биш юм. “Чингис Хааны тал нутаг-Монголын нүүдэлчид” үзэсгэлэнг зохион байгуулахад сэтгэл зүтгэлээ нэгтгэсэн Moesgaard музейн удирдлага, эрдэмтэд судлаачид, нийт хамт олонд чин сэтгэлийн халуун баяр хүргэе” гэв.

Мөн тус үзэсгэлэнд Монгол Улсын ШУА-ийн Түүх, археологийн хүрээлэнгээс түрээслэн Данийн музейд анх удаагаа дэлгэн, олны хүртээл болгож буй 13-р зууны үеийн морьтон цэргийн булш /сүлжээтэй үс, хумс, шүд, нум сум, тухайн үед хэрэглэж байсан эд хэрэглэлтэйгээ олдсон/ олны анхаарлыг ихэд татаж, Даний музейн удирдлагын зүгээс ихээр олзуурхан цаашид мумиг судлах, судалгаанд хамтран оролцох хүсэлтэй байгаагаа илэрхийлэв.

Швед улс бэлэн мөнгөний хэрэглээнээс татгалзаж буйтай холбогдуулан тус Элчин сайдын яам өнөөдрөөс буюу 2018 оны 5 дугаар сарын 17-ны өдрөөс эхлэн иргэдэд үзүүлж буй консулын үйлчилгээний төлбөрийг бэлэн бусаар буюу банкны картаар хүлээн авч эхлээд байна.

Консулын үйлчилгээнд карт уншигч машиныг нэвтрүүлснээр иргэдэд үйлчилгээг илүү хялбар, түргэн шуурхай хүргэх боломжтой болж байна.

Монгол Улсаас Шведийн Вант Улсад суугаа Элчин сайдын яам

Тус ЭСЯ 2018 оны 5 дугаар сарын 19-ний өдөр /Бямба гарагт/ Шведийн Вант Улсын Гётеборг хотод оршин суугаа иргэдэд консулын үйлчилгээ үзүүлнэ.

Хаяг: Riksdalersgatan 23A, 414 81 Göteborg, Sweden

Цаг: 14.00 – 18.00 цагийн хооронд 

Иргэдэд дараах консулын үйлчилгээг үзүүлнэ. Үүнд:

1. Төрснийг бүртгэж, гэрчилгээ олгох. 
Бүрдүүлэх шаардлагатай бичиг баримтын жагсаалт болон холбогдох мэдээллийг http://stockholm.mfa.gov.mn/index.php… –ээс харна уу.

2. Гэрлэснийг бүртгэж, гэрчилгээ олгох.
Бүрдүүлэх шаардлагатай бичиг баримтын жагсаалт болон холбогдох мэдээллийг http://stockholm.mfa.gov.mn/index.php… –ээс харна уу.

3. Үндэсний энгийн гадаад паспорт захиалах. 
Бүрдүүлэх шаардлагатай бичиг баримтын жагсаалт болон холбогдох мэдээллийг http://stockholm.mfa.gov.mn/index.php… –ээс харна уу.

4. Буцах үнэмлэх олгох. 
Бүрдүүлэх шаардлагатай бичиг баримтын жагсаалт болон холбогдох мэдээллийг http://stockholm.mfa.gov.mn/index.php… –аас харна уу.

5. Иргэний шинэчилсэн бүртгэлд бүртгүүлэх. 
Бүрдүүлэх шаардлагатай бичиг баримтын жагсаалт болон холбогдох мэдээллийг http://stockholm.mfa.gov.mn/index.php… –аас харна уу.

6. Итгэмжлэл гэрчлэх, нотариатын үйлчилгээ үзүүлэх. 
Дэлгэрэнгүй мэдээллийг http://stockholm.mfa.gov.mn/index.php… –аас харна уу.

Тус ЭСЯ-ны суугаа орны алслагдсан хотуудад консулын үйлчилгээ үзүүлэхэд консулын үйлчилгээний хураамж дараах байдлаар нэмэгдэхийг анхаарна уу. /Энэ заалт нь зөвхөн нотариатаар батлуулсан итгэмжлэлийг тус ЭСЯ-аар дамжуулж ГХЯ-ны Консулын газар руу баталгаат цахим шуудан /Fax/-аар илгээх асуудалд хамааралтай болно/.

- Гётеборг хот: консулын үйлчилгээний хураамж – 130 швед крон. 

7. Монгол Улсад зорчих виз мэдүүлэх, олгох. 
Жуулчин ангиллын 30 хоногийн хугацаатай орох-гарах виз мэдүүлэх болон бусад дэлгэрэнгүй мэдээллийг http://stockholm.mfa.gov.mn/index.php… –ээс харна уу.

Монгол Улсын Тэмдэгтийн хураамжийн тухай хуулийн 41.3.6 дахь зүйлд “Монгол Улсын иргэний гадаад улсын харьяатаар төрсөн 16 хүртэлх насны хүүхдийг визийн хураамжаас чөлөөлөх” гэх заалтыг үндэслэн Гадаад иргэншилтэй бөгөөд эцэг эхийн аль нэг нь Монгол Улсын харьяат хүүхэд визийн төлбөрөөс хөнгөлөгдөж 50 Швед кроноор виз мэдүүлэх боломжтой ба дараах материалыг бүрдүүлэх шаардлагатай.

- Монголын хилээр орсноос хойш 6 сарын хугацаанд хүчинтэй гадаад улсын паспорт,
- 1 хувь цээж зураг,
- Визийн мэдүүлэг /https://drive.google.com/file/d/1W9aokJMzRQCjrjlhuQQ1kER9iPJjY1Kd/view - аас татаж авна уу./ 
- Монгол иргэншилтэй эцэг эсвэл эхийн иргэний үнэмлэх эсвэл гадаад паспортын хуулбар,
- Тухайн гадаад иргэншилтэй хүүхдийн эцэг эсвэл эх гэдгийг нотолсон бичиг баримт /төрсний гэрчилгээний хуулбар, хүүхэд төрсөн тухай эмнэлэгийн бичиг, Татварын газар /Skatteverket/-ын нотлох бичгийн аль нэг/

ЖИЧ: Консулын үйлчилгээ авахаар ирэх иргэд тус ЭСЯ-ны цахим хуудаст дурдсан бичиг баримтуудыг зайлшгүй бүрдүүлэх шаардлагатай ба дутуу бүрдүүлсэн бичиг баримтаас үүдэн консулын үйлчилгээг үзүүлэх боломжгүй болох магадлалтайг анхаарна уу. 
Түүнчлэн, консулын үйлчилгээний төлбөрийг бэлнээр болон тус ЭСЯ-ны Embassy of Mongolia, Nordea bank account: PlusGiro 52199-7 данс руу шилжүүлэх боломжтой.

Монгол Улсаас Шведийн Вант Улсад суугаа Элчин сайдын яам

Шведийн Вант Улсын Боловсролын удирдах газрын харьяа Стокгольм дүүргийн хэлний төвийн монгол хэлний багш нараас жил бүр уламжлал болгон зохион байгуулдаг "ЭХ ХЭЛ-АМЖИЛТЫН ТҮЛХҮҮР" өдөрлөг 4 дэх жилдээ 2018 оны 4 дүгээр сарын 21-ний өдөр амжилттай зохион байгуулагдав.

Уг өдөрлөгийн зорилго нь эх хэлээ хойч үедээ өвлүүлэх, Швед улсад сурч, амьдарч буй залууст тус улсын боловсролын системийн талаарх шинэ мэдээ мэдээллийг өгөх, Швед улсын ахлах болон их дээд сургуульд элсэн орох талаар зөвлөгөө өгөхөд чиглэдэг.

Энэхүү арга хэмжээний үеэр "Хос жигүүр" төв, Стокгольм дүүргийн дунд сургуульд суралцаж буй бага ангийн сурагчдын цагаан толгойн "Эрдмийн баяр" болсоноос гадна хос хэлээрх “Манжин” жүжигчилсэн тоглолт үзэгчдийн сонирхолыг ихэд татлаа. Мөн оюутан Т.Чинзориг, А.Анар, Б.Урандөл нар их дээд сургууль, гимназид хэрхэн элсэн орох талаарх илтгэлийг тавьж, багш нарын зүгээс боловсролын системийн тогтолцоонд анхаарах асуудлаар иргэдэд мэдээлэл, зөвлөгөө өгөв.